ЯҢАЛЫКЛАР


5
июль, 2017 ел
чәршәмбе

Урамнар да кәефне күтәрә ала. Көзге як, бертуктаусыз яңгыр төти. Күңелсезләнеп кенә барганда бер урам коймасына ясалган кояш игътибарны җәлеп итте. Янәшәсенә “Исәнме, кояш!” дип тә язып куйганнар. Беләсезме, менә шунда күңел кыллары тибрәнеп куйды, кәеф күтәрелде, көн дә яктырып киткәндәй булды.
Узган якшәмбедә шәһәребезнең Левитан урамыннан үтәргә туры килде. Бу урамга кергәнче аз гына чигенеш ясап алыйк әле.
Моннан унбиш–егерме еллар элек Арча урамнарында чәчәк үстереп буласына берәү дә ышанмый иде. Актанышка барып андагы хозурлыкка сокланып кайтучылар да баштарак: “Бездә барып чыкмас, өзеп бетерерләр чәчәкне”, – дигән фикердә иделәр. Күп каршылыклар белән керде бу яңалык. Күзләребез дә алабутага ияләнгән иде шул, аннан аерылуы читенрәк тоелды. Аның каравы, бүген шәһәр урамнары гына түгел, кайбер капка төпләре чәчәккә күмелгән. Бакчасында чәчәк үстермәгән кеше бармы икән бүген?
Левитан урамында өлкән яшьтәгеләр һәм инвалидлар йорты (аның бакчасы да гөлбакча) каршында яшәүче Гөлүсә Вәлиуллиналарның капка төбе, йорт–бакчалары – үзе кояш кебек. Һәр елны бит бу, күпме хезмәт, тырышлык кирәк моның өчен! Бу урамның үз кояшы бар!

Арчаның Йолдызлар аллеясы тагын ике йолдызга артты. Мондагы 19 йолдыз янына Лесхоз мәктәбен тәмамлаган Марат Зиннәтовның һәм Арчаның икенче мәктәбеннән Фәнүзә Сәлахованың исемнәре дә өстәлде.
Инде традициягә әйләнгән аллеяда йолдызлар кабыну көнен чыгарылыш сыйныф укучылары ел саен көтеп ала. Быел да уку дәверендә уңышларга ирешкән 40 медаль иясе өчен район башлыгы Илшат Нуриев кулыннан Рәхмәт хатлары алу гомерләренә истә калырлык вакыйга булды. Илшат Габделфәрт улы сәләтле укучыларны укуларын дәвам иттереп, киләчәктә дип- ломлы белгечләр булып районыбызга әйләнеп кайтырга чакырды. Кичәгә кунак булып килгән ТР фән һәм мәгариф министры урынбасары Лариса Сулима министрның котлавын ирештереп, районыбыздагы сәләтле укучыларның уңышлары республика күләмендә билгеле булуын җиткерде, яңа биеклекләргә җилкендерде.
Аллеядагы йолдызлар ел да районыбызның иң тырыш, булган, сәләтле, уңышка ирешкәннәр хөрмәтенә кабына. Марат өчен олимпиадаларда җиңү яулап кайту гадәти хәл булса, Фәнүзә туган мәктәбен спорт өлкәсендәге уңышлары белән сөендерә. 

Район социаль яклау идарәсе җитәкчесе вазыйфаларын башкаручы Резедә Галиуллина Арчада яшәүче Җәвәһирә Сираҗетдинованы 90 яшьлек юбилее белән котлады. Ул юбилярга Президент В. Путинның һәм район башлыгы И. Нуриевның Рәхмәт хатларын тапшырды.
Арчада көн итүче Җәвәһирә Сираҗетдинова бәхетле ана – ул ялгыз түгел. Ә тагын да әһәмиятлерәге – кадер-хөрмәттә яши.
Резеда Галиуллина белән Арчаның Завод урамы, 13 йортына килеп туктадык. Капка төбендә Җәвәһирә апаның улы Рафаэль әфәнде көтеп тора иде. Без Рафаэль Сираҗетдиновны төзелеш оешмаларын җитәкләгән югары белемле төзүче, үз эшен башлап җибәргән эшмәкәр, тәртипле, тыйнак кеше буларак беләбез. Ә киленнәре Флера ханым Арчаның 5нче балалар бакчасында тәрбияче булып эшләгән педагог. Флера ханым Мари Иле авылы Күлбашта үскән кыз. 
– Флера Арча педучилищесында укыды, – дип сөйләде Җәвәһирә апа. – Ул безнең күршедә генә фатирда яшәде. Менә шуннан улым белән танышып кавыштылар. Флера бик әйбәт.
Алар 40 ел бергә яшиләр. Үзара җылы мөнәсәбәтне чит кеше дә тоеп ала. Без дә бу матур мөгамәләләрне күреп һәм сизеп сокландык. Әлбәттә, тормыш булгач, төрле хәлләр булгандыр, әмма хатын-кызның зирәклеген күрсәтүче иң мөһим сыйфат – үпкәләшүләрне үткәреп җибәрә белү. 

Курсалар тырышып эшли, матур итеп ял да итә беләләр. Узган шимбәдә гөрләтеп Сабантуй бәйрәме уздырдылар. Бер–бер артлы килеп торган яңгыр болытлары да өркетмәде, ел буе көтеп алган бәйрәмдә кеше күп иде. 
Урта Курса авыл җирлеге башлыгы Рәмзия Вафина бәйрәмне ачып, халыкның тулы канлы тормыш белән яшәвен билгеләп үтте. Урта Курса мәчетенең имам–хатыйбы Ислам хәзрәт дога укыды. Янәшәдәге мәһабәт мәчеттән яңгыраган азан авазы мәйдан өстенә таралды. 
Район башкарма комитеты җитәкчесе Илшат Галимуллин җыелган халыкны милли бәйрәмебез белән тәбрикләде, курсаларга фидакарь хезмәтләре өчен рәхмәт әйтте, уңышлар теләде. Ул хуҗалыкның алдынгы механизаторлары Радик Сафиуллинга Авыл хуҗалыгы һәм азык–төлек министрлыгының, Динар Шакиров белән Ленар Сафинга район башлыгының Рәхмәт хатларын тапшырды.

Начар күрүчеләр җәмгыяте әгъзалары ел да җыелып, башкарган эшләргә нәтиҗә ясыйлар, киләчәккә планнар төзиләр, проблемаларны уртага салып сөйләшәләр. Узган атнада Арча үзәк китапханәсендә үткән конференциядә дә бик күп сорауларга җаваплар таптылар, үзләрен борчыган мәсьәләләргә дә тукталдылар. Аны җәмгыять җитәкчесе Зөфәр Зарипов ачты һәм килгән кунаклар белән дә таныштырып үтте. 
Җыелышта район башкарма комитеты җитәкчесе урынбасары Рамил Гарифҗанов, район ветераннар советы рәисе Наил Габдрахманов, халыкны социаль яклау бүлеге җитәкчесе вазыйфаларын башкаручы Резеда Галиуллина катнашты. Җыелышка Татарстан Республикасының сукырлар һәм начар күрүчеләр өчен махсус республика китапханәсе директоры Наил Сәфәргалиев һәм китапханәнең бүлек җитәкчесе Миләүшә Әхмәтова кайткан иде.
Узган елның ноябреннән бүгенге көнгә кадәр нинди эшләр башкарылган? Беренче чиратта начар күрүчеләр җәмгыятенең исәбе тыңланды. Бүгенге көндә җәмгыятьтә 145 кеше исәпләнә. Шуның 130ы өлкәннәр. 18 яше тулмаган 6 бала исәпләнә. 47се беренче, 66сы икенче, калганнары өченче төркем инвалидлар. Алар арасында бик активлары бар. Мөмкинлекләреннән чыгып районның җәмәгать тормышында, мәдәни чараларда, спорт ярышларында, түгәрәк өстәлләрдә, конференцияләрдә актив катнашалар, Арча Мәдәният йортында үткәрелгән хәйрия концерт–спектакльләренә йөриләр, экскурсияләргә баралар. Шушы 25 кеше Яңа Кенәрдәге “Өмет” тернәкләндерү үзәгендә, шифаханәләрдә сәламәтлекләрен ныгытып кайткан. Мәктәп яшендәге балалар Лаештагы махсус уку йортында белем ала. 


ЯҢАЛЫКЛАРГА ЯЗЫЛУ
Сайттагы барлык материаллар лицензия буенча тәкъдим ителә:
Creative Commons Attribution 4.0 International